Påskefeiring 2023 i Jerusalem, del 4
«Han er oppstaden! Ja, han er sanneleg oppstaden!» Me deltok på friluftsgudsteneste påskemorgon kl 05.30 på Oljeberget, med utsikt mot aust over Dødehavet og Jordan. Det var ennå mørkt, men snart kom sola og dagslyset.
Gudstenesta var eit samarbeid mellom Den Danske Kirke i Jerusalem og Swedish Theological Institute, den svenske kyrkja sitt studiesenter i byen. Me var også nokre få nordmenn som deltok. Det var både ei fin naturoppleving og ei god feiring av Jesu oppstode.
Me song kjende og ukjende påskesalmar på dansk og svensk. Sjølv om me dessverre ikkje song Påskemorgen slukker sorgen, var denne salmen sterkt med meg i tankane. Det var den første påskesalmen eg lærde som barn, og den betyr framleis mykje for meg.
Påskemorgen slukker sorgen, slukker sorgen til evig tid;
N. F. S. Grundtvig. Norsk salmebok nr 196, vers 1
den har oss givet lyset og livet, lyset og livet i dagning blid.
Påskemorgen slukker sorgen, slukker sorgen til evig tid.
Evangeliet blei lese frå Mark 16,1-8 om kvinnene som kom tidleg om morgenen til grava for å salva den døde Jesus. Dei fann ei tom grav og ein engel som sa:
«Ver ikkje redde! De leitar etter Jesus frå Nasaret, den krossfeste. Han er stått opp, han er ikkje her. Sjå her er staden der dei la han! Men gå av stad og sei til læresveinane hans og til Peter: ‘Han går føre dykk til Galilea. Der skal de få sjå han, slik han har sagt dykk.’»
Mark 16,6-7, bibel.no
I gudstenesta delte me brød og vin. Og etter gudstenesta hadde me fellesskap omkring eit bord med «let morgenmad».
Inger og eg tok taxi opp til Oljeberget, men me ville gå ned igjen. Me gjekk langs toppen av Oljeberget til Himmelfartskapellet, og vidare til den flotte kyrkja Dominus Flevit. Så gjekk me ned bakkane til Getsemanehagen og deretter lenger ned i Kedrondalen, der det ligg nokre gamle og store gravmonument. Så opp igjen til Gamlebyen, inn Søppelporten og til Vestmuren. Og deretter vidare til Jaffa Street der me budde. Det var ein fin morgontur mens det ennå nærast var folketomt langs vegane og inne i kyrkjene. Og det blei faktisk også tid til ein liten kvil før neste påskegudsteneste!
Det neste målet vårt for denne påskedagen, var å delta på felles-skandinavisk festgudsteneste i Gravhagen kl 11.30. Her var det mange fleire nordmenn enn på Oljeberget, faktisk også nokre kjenningar heimefrå. Og me song enda fleire påskesalmar, – på norsk, dansk og svensk. Gudstenesta blei leia av den danske presten David Serner som me nå hadde vore saman med mange gonger gjennom påsken. Og preika var ved Eyvind Volle, som nå er ny pastor i Immanuelkyrkja i Tel Aviv, utsend av Den Norske Israelsmisjon.
Det var flott å få feira påske i byen der Jesu død og oppstode skjedde!
Deg være ære, Herre over dødens makt!
Evig skal døden være Kristus underlagt.
Lyset fyller haven, se, en engel kom,
åpnet den stengte graven, Jesu grav er tom!Deg være ære, Herre over dødens makt!
Edmond L. Budry, omsett til norsk av Arne Fjelberg. Norsk salmebok nr 197, vers 1
Evig skal døden være Kristus underlagt.
Her er heile serien om påskefeiring i Jerusalem 2023:
Arne Berge 