På sundag er det konfirmasjon igjen i kyrkja her på Bryne. Nå når me har både vinter- og sommarkonfirmantar, blir det konf-gudstenester både vår og haust. Men det er bare flott! For ein finare festdag enn ein konfirmasjon, det skal ein leita lenge etter! Det er 40 konfirmantar i denne gruppa, og det blir to konf-gudstenester (kl 10.30 og 12.30). Eg gleder meg, og det er det nok mange andre òg som gjer!
For nokre veker sidan kom me heim frå ein flott konfirmantleir på Åpta. Der hadde me kjekke dagar saman som eg ikkje ville vore forutan! Du kan lesa meir om leiren her.
"Eg syns det er flott å vera prest for konfirmantane i menigheten. Ja, eg er faktisk litt stolt av å vera presten deira, sjølv om eg sjølvsagt ikkje eig desse ungdomane og heller ikkje skal ta æra for kven dei er eller koss dei oppfører seg. Men gjennom eit år med ulike formar for samlingar og fellesskap blir me som har ansvar for konfirmantarbeidet, glade i ungdomane! Dei har mange spørsmål og det bur sjølvsagt både tvil og tru i dei. Men først og fremst opplever eg det flott at så mange ungdomar er opne og interesserte i kva den kristne trua er og betyr. Sjølvsagt veit eg at dei ulike ungdomane plasserer seg sjølv på ulikt vis i forhold til det å leva i tru. Derfor heiter det òg at formålet med konfirmantarbeidet i Den norske kyrkja er "å vekke og styrke troens liv som gis i dåpen for at de unge kan leve i menighetens fellesskap og vokse som Jesu Kristi disipler". Å vera konfirmant er å vera i ein prosess, og konfirmantopplegget som kyrkja har i dag, legg vekt både på opplæring og på oppleving."
Slik skreiv eg i mai i eit innlegg her på bloggen om koss eg som er prest tenkjer om konf-arbeidet. Du kan lesa heile innlegget her. Eg har ikkje forandra synspunkt på dette på fire månadar, og står framleis for det eg skreiv i vår!
Eg tar med ei av bønene for konfirmasjonen, og lar det vera mi bøn for desse ungdomane nå i dagane fram mot konfirmasjonen:
"Kjære Gud, me takkar deg for konfirmantane. Du har skapt dei i ditt bilete og gjeve dei livet i gåve. Du gjorde dei til dine born i den heilage dåpen. Hjelp dei til å vera uthaldande i bøna og trufast bruka ditt ord og den heilage nattverden. Styrk dei i trua, vona og kjærleiken, så dei saman med alle som trur på deg, kan vedkjennast Jesu Kristi namn og i ord og gjerning takka og tena deg.
Ver nær hos konfirmantane, og la dei alltid ha ein trygg stad i di kyrkje. Vara dei mot alt vondt og gjev dei visdom og kraft når livet vert vanskeleg. Verna dei og hjelp dei i dag og alle dagar."